wickelvielfalt
Schampar güeti Grind ver z'umwältfröindlich Wickle mit Stoffwindle:
CHÜDER
Stoffwinlde verursachent praktisch kei Abfall. Äs Baby/Chind brücht durchschnittlich 5'000 – 6'000 Wägwärfwindle während schiner Wickelzyt. Das ergit güet ei Tonna Abfall.
MATERIALIE
Stoffwindeln sind üs natürliche Materialie. Z’Wickle mit Stoffwindeln isch sehr schonend ver die zart Babyhüüt. Die meiste Wägwärfwindle enthaltet chemischi Substanze (z.B. Duftstoffa, Bleichmittel usw.). Summi va dene Chemikalie chennent hüütreizend ver z’Mämmi sii oder sogar allergischi Reaktione üsleese. Vil Wägwärfwindle sind üs Kunststoff (insbsunders üs Polyethylen und üs Polypropylen) produziert. Ensprächend brücht ei Wärgwärfwindla ungefähr 300 – 450 Jahr bisch zersetzt isch.
STUDIA ÜSEM 2023
En aktuelli Studia üsem 2023 zeigt, dass der ökologisch Füessabdruck va Stoffwindle 25% teifer üsfallt im Verglich zu Wägwärfwindle. Hiä geits zer Studia (englisch) Life Cycle Assesment Studie
STUDIA ÜSEM 2008
Innere britische Studia im Jahr 2008 het mu festgstellt, dass d’Härstellig va Wägwärfwindle nu gresseri Umwältüswirkige het, wäder ihre Abfallentsorgig durch Deponie. Hiä geits zer Studia (englisch) An updated lifecycle assessment for disposable and reusable nappies
BREITS WICKLE
Durch d’Nutzig va Stoffwindle wird automatisch breit gwicklet. Z’breit Wickle isch nit nur güet wenn z’Mämmi Hüftdysplasie het. Z’breit Wickle stabilisiert und stercht d’Hüftgleich und unnerstitzt d'Hüftentwicklig ine erste Läbensmanet.
TEMPERATÜR
D’Innetemperatur ine Stoffwindle isch nachwiislich teifer wäder ine Wägwärfwindle. Das isch vorallem ver Büebe es wichtigs Thema in Bezug üf d’Entwicklig vane Hode und Spermiezahl.
CHESTE
Öi der finanziell Aspäkt spricht ver z’Wickle mit Stoffwindle: D’Aschaffigscheste und d’Cheste ver z’Wäsche sind teifer, wäder d’Cheste ver Wägwärfwindle. Nutzt mu d’Stoffwindle ver mehreri Chind, spart mu gad numal.
​
Hiä geits zume detaillierte Chostevergliich.
UNFÄLL
Z'Gaggi isch insch ine Stoffwidle bis jez niä üsgrunne.
wickelvielfalt
Üs persönlicher Erfahrig chan ich festhalte, dass e hüüfe Vorurteil uber Stoffwindle bi insch nit iträtte sind:
MIEHSAM UND ÜFWENDIG
Miehsams Wäsche und zytüfwendige Pfleg: Sicher isch das abhängig vam System wame nutzt. Wiär brüche Prefolds und PUL-Uberhose: So gits insch inner Wucha 2 Wäschtrummle meh zum Wäsche. Aber ehrlich, meh wäder gad di Trummla lade, Wäschmittel ifille und na ine Tömmler umlade is ja nit. Mu müess ja nit näbs der Wäschmaschina und/oder dum Tömmler stah und züelüege, wie d’Ilage gwäsche und trochnent wärdent. Di PUL Uberhose chame bi Bedarf mit der normal 40 Grad Babywäsch mitwäsche.
ALTMODISCH
Va friäner kennt mu nu di Windle wa zum Falte sind. Hitzutagsch gits en unendlichi Vielfalt an System, Materialie, Farbe und Motiv. So hei wiär ver insch di optimalschte Stoffwindle chenne zämestelle - topmodern und sehr bunt versteit schich.
UMSTÄNDLI
Obmu en Stoffwinla dum Mämmi aleit oder en Wägwärfwinlda spillt zytlich und vaner Handhabig kei Rolla.
UNHÜGIENISCH
Äs isch zwar korräkt, dassmu der Stüehlgang vam Mämmi ab Biichost im WC (statt inklusiv Wägwärfwindla im Chüder) entsorgt. Mit dum richtige Vlies gits öi biner Stoffwinlda kei dräckigi Hend.
UNPRAKTISCH
Unnerwägs: Äs isch klar, dassmu di Stoffwinlde nassi und/oder dräckigi müess heimnä. Allerdings gits chliini Wetbags wamu di verschmutze Sache chat ipacke. So stiichts nit und deheime chame schi wiä gwohnt lagere. Und näbebii: Je nach dem wame unnerwäx isch, chame öi d’Wägwärfwindle nit ime Chüder entsorge und müess schi äbefalls mitnä.